2026-жылдын 15-январында Монголия тарабынын демилгеси менен Кыргыз Республикасынын Президентине караштуу Виртуалдык активдер жана блокчейн-технологиялар чөйрөсүн өнүктүрүү боюнча улуттук кеңештин Катчылыгынын жетекчиси Фархат Иминовдун Монголиянын Кыргыз Республикасындагы Атайын жана Ыйгарым укуктуу Элчиси Содном Ганхуяг менен жолугушуусу өттү.

Жолугушууда монгол тарап Улуттук кеңештин жана анын Катчылыгынын ишмердүүлүгүнө, ошондой эле виртуалдык активдер жаатындагы Кыргыз Республикасынын мыйзамдарын өркүндөтүүгө, санариптик сомду киргизүүгө жана калктын финансылык сабаттуулугунун деңгээлин жогорулатуу маселелерине кызыгуусун билдирди.

Фархат Иминов Улуттук кеңештин максаттары жана милдеттери, ошондой эле анын аткаруучу органы катары Катчылыктын ролу жөнүндө айтып берди. Виртуалдык активдер жана блокчейн технологиялар жаатындагы мамлекеттик саясаттын негизги багыттары, анын ичинде мыйзам чыгаруу, институционалдык жана инфратүзүмдук демилгелер белгиленди.

Талкуунун бир бөлүгү катары криптовалютаны кабыл алуунун глобалдык индекси боюнча Кыргызстан 19-орунда тураары жана Борбордук Азия аймагында лидерлиги баса белгиленди. Бул контекстте, ошондой эле кыргызстандык KGST стейблкоини КМШ өлкөлөрүнүн ичинен Binance глобалдык криптовалюта платформасында листингге чыккан алгачкы стейблкоин болгону баса белгиленди. Тараптар ошондой эле чек ара аркылуу эсептешүүлөрдө стейблкоиндерди колдонуунун келечегин талкуулашты.

Санариптик финансыны туруктуу өнүктүрүүнүн маанилүү элементи катары финансылык жана санариптик сабаттуулукту жогорулатууга багытталган платформаларга жана программаларга өзүнчө көңүл бурулду.

Жолугушуунун жыйынтыгында Монголиянын Элчиси Содном Ганхуяг Кыргыз Республикасынын жетишкендиктерин жогору баалап, виртуалдык активдер жана блокчейн-технологиялар жаатындагы Кыргызстандын тажрыйбасын андан ары изилдөөгө кызыкдар экенин билдирди.